Select Page

Útskrift frá FAS

Í dag fór fram útskrift frá FAS. Að þessu sinni útskrifast 14 stúdentar og átta nemendur af Vélstjórn A.

Nýstúdentar eru: Andrea Rán Ragnarsdóttir Breiðfjörð, Aníta Aðalsteinsdóttir, Arna Ósk Arnarsdóttir, Ástrós Aníta Óskarsdóttir, Birgir Sigurðsson, Daníel Snær Garðarsson, Guðrún Brynjólfsdóttir, Hermann Þór Ragnarsson, Karen Ása Benediktsdóttir, Ragna Björk Einarsdóttir, Signý Ingvadóttir, Tinna María Sævarsdóttir, Tómas Orri Hjálmarsson og Þórunn María Kærnested.

Af A stigi vélstjórnar útskrifast: Atli Dagur Eyjólfsson, Benedikt Óttar Snæbjörnsson, Gísli Eysteinn Helgason, Kjartan Jóhann R. Einarsson, Kolbeinn Benedikt Guðjónsson, Sigurður Helgi Pétursson, Steindór Már Ólafsson og Þröstur Jóhannsson. 

Bestum árangri á stúdentprófi að þessu sinn nær Tinna María Sævarsdóttir.

Starfsfólk FAS óskar útskriftarnemendum öllum til hamingju með áfangann og óskar þeim velfarnaðar í framtíðinni.                  
                                

 

Útskrift frá FAS

Laugardaginn 21. maí verður útskrift frá FAS. Að þessu sinni útskrifast átta nemendur af Vélstjórn A og fjórtán stúdentar. Athöfnin fer fram í Nýheimum og hefst klukkan 14.

Allir velkomnir á meðan húsrúm leyfir. Það væri gaman ef þeir sem eiga útskriftarafmæli mæti.

Hæfniferð vor 2022 – Núpstaðaskógur – Skaftafell

Eftir langan og skemmtilegan vetur endar námsár nemenda við Fjallamennskunám FAS á áfanganum Hæfniferð. Markmið áfangans er að nemendur undirbúi og skipuleggi eigin ferð á hálendi Íslands. Þegar hópurinn lagðist í fyrstu skipulagsvinnuna þá komu upp margar hugmyndir. T.d. gönguferð um Lónsöræfi, gisting í tjöldum á Öræfajökli, toppadagar í Tindfjöllum og á Eyjafjallajökli.

Margar skemmtilegar hugmyndir voru nefndar en að endingu varð ganga frá Núpstaðaskógum yfir í Skaftafell fyrir valinu þar sem ferðast er með allt á bakinu um 33 kílómetra leið. Ferðin hófst með akstri inn í Núpstaðaskóg með Aroni hjá Local Guide of Vatnajökull. Þaðan hélt leiðin áfram inn Núpstaðaskóg og upp keðjuna margfrægu. Eftir að nemendur og kennarar höfðu tryggt sig þar upp með viðeigandi búnaði var leitað að góðum náttstað.

Ákveðið var að halda snemma af stað daginn eftir þar sem lengsti leggurinn væri framundan, Skeiðarárjökull. Langur en frábær dagur þar sem nemendur þurftu að rata um krefjandi jöklalandslag í þoku mestallan daginn. Fundinn var góður náttstaður undir Færneseggjum, tjaldbúðir reistar og kærkominn kvöldmatur snæddur.

Á þriðja degi þarf að þvera sig í gegnum Skaftafellsfjöll og svo upp og yfir Blátind. Færið var þungt og þurftu nemendur að troða snjó á köflum upp í mitti, en eftir að hafa æft og þjálfað sig í heilan vetur þá gekk þessi dagur alveg glimrandi vel. Allir skiptust á að leiða, segja sögur og alltaf var stutt í húmorinn. Þegar allir voru komnir öryggir fram hjá Blátindi var ákveðið að tjalda í 400 metrum við Vestragil.

Á fjórða degi var haldið í átt að bílunum og farið var yfir Skaftafellsheiði. Dagurinn var frekar afslappaður og var ákveðið að njóta á leiðinni til baka. Frábært var að sjá hversu natnir starfsmenn Vatnajökulsþjóðgarðs hafa verið í gegnum árin að byggja upp svæðið, þar sem göngustígar og allar upplýsingar eru alveg til fyrirmyndar.

Eftir um 33 kílómetra göngu komust nemendur og kennarar loks í bílanna þar sem endað var á góðum teygjuhring. Einn dagur var eftir og því þurfti að skipuleggja alveg frábæran dag til að enda áfangann. Ferð í Ingólfshöfða með Einari hjá Öræfaferðum varð fyrir valinu og hvílíkur dagur. Nemendur höfðu sérstaklega gaman að sjá reyndan leiðsögumann í sínu náttúrulega umhverfi og ekki spillti fyrir magnið af lundamyndunum sem náðust í ferðinni. Ferðin heppnaðist vel í alla staði og vilja nemendur og kennarar koma sérstöku þakklæti til allra þeirra sem lögðu hönd á plóg til að láta ferðina verða veruleika.

Takk fyrir frábæran vetur og gleðilegt sumar!

Stjórnarskipti hjá NEMFAS

Í dag lauk formlega starfi í nemendafélagi FAS á yfirstandandi skólaári. Starfsemi nemendafélagsins hefur gengið þokkalega þó sérstaklega á vorönninni eftir að takmörkunum tengdum covid var aflétt. Fimm klúbbar voru starfandi á skólaárinu og stóðu þeir fyrir fjölbreyttum viðburðum ásamt stjórn nemendafélagsins. Hápunktur í starfsemi vetrarins er þó einstaklega vel lukkuð árshátíð í mars.

Aðalfundur nemendafélagsins var haldinn í síðustu viku og var mæting hin ágætasta. Fyrir fundinn hafði verið auglýst eftir áhugasömum nemendum til að leiða starf nemendafélagsins á komandi skólaári og komu nokkrar umsóknir. Eftir kosningar er það ljóst að Dagmar Lilja verður forseti nemendafélagsins og Júlíana Rós varaforaseti. Filip er fulltrúi FAS í SÍF (Sambandi íslenskra framhaldsskólanema). Við óskum þeim til hamingju og hlökkum til að fylgjast með störfum þeirra í haust.

Á þessum tímamótum viljum við líka þakka fráfarandi stjórn frábær störf í vetur. Þau hafa svo sannarlega staðið sig við oft krefjandi aðstæður. Meðfylgjandi mynd sýnir þau Tómas Nóa, Sævar Rafn og Selmu Ýri og var myndin tekin þegar stjórnin skilaði af sér.

Kynningar á lokaverkefnum nemenda

Í gær var síðasti kennsludagur annarinnar í FAS. Þá var líka kynning á lokaverkefnum væntanlegra útskriftarnemenda en frá því að núverandi námskrá skólans tók gildi hafa allir útskriftarnemendur þurft að vinna slík verkefni. Þar er lögð áhersla á að nemendur kynni sér aðferðir til að vinna skipulega og koma upplýsingum á framfæri á skýran og greinargóðan hátt.

Kynningarnar í gær voru fjölbreyttar. Margir nemendur höfðu lagt fyrir kannanir og skrifað skýrslu tengda niðurstöðunum. Þá voru líka kynningar þar frá nemendum sem höfðu unnið verkefni tengd áherslum sínum í námi, t.d. á lista- og menningarsviði skólans.

Lokamatsviðtöl hefjast í dag og standa fram í næstu viku. Allir nemendur þurfa að ræða við kennara sína um námið og önnina. Sá fundur getur verið í skólastofu eða í gegnum Teams eftir aðstæðum. Lokamatsviðtölum á að vera lokið 19. maí og því styttist að nemendur komist út í sumarið.

Sinfóníuhljómsveit Suðurlands spilar í Nýheimum

Það má með sanni segja að Nýheimar hafi iðað af lífi og sál í morgun en þá hélt Sinfóníuhljómsveit Suðurlands tónleika fyrir nemendur í grunnskólanum og FAS. Hljómsveitin fagnar sumri með tónleikum á nokkrum stöðum á Suðausturlandi.

Tónleikarnir hófust á því að stjórnandi hljómsveitarinnar Guðmundur Óli Gunnarsson kynnti hvaða hljóðfæri er að finna í hljómsveitinni og hvert hljóðfæri gaf tóndæmi. Aðalefni tónleikanna var þó tónverkið “Lykillinn” eftir þá Tryggva Má Baldvinsson og Sveinbjörn I Baldvinsson og er verkið eins konar “Pétur og úlfurinn” úr íslenskum sagnveruleika. Sögumaður í tónverkinu var Stefán Sturla.

Það er skemmst frá því að segja að tónleikarnir tókust ljómandi vel og ekki að sjá annað en allir nytu þessa menningarviðburðar í Nýheimum á mánudagsmorgni.