Það er heldur betur fjör í Nýheimum í dag því nú stendur yfir Starfastefnumót. Það eru ríflega 40 fyrirtæki og stofnanir sem kynna starfsemi sína sem svo sannarlega endurspegla atvinnulífið í landinu. Að sjálfsögðu tekur FAS þátt og eru nemendur okkar áberandi við ýmis störf í dag. Frá því á mánudag hafa staðið yfir svokallaðir Vísindadagar í skólanum og var ákveðið að tengja þá Starfastefnumótinu að þessu sinni.
Það er mikilvægt að kynna fyrir samfélaginu hversu mörg störf eru innt af hendi á okkar svæði. Þá er líka mikilvægt fyrir unga fólkið okkar að sjá við hvað væri hægt að starfa í framtíðinni og vera með búsetu á svæðinu.
Kynningarbásarnir á Starfastefnumótinu verða opnir til 16:30 í dag og við hvetjum alla til að kíkja við í Nýheimum í dag.
Í næstu viku er komið að svokölluðum vísindadögum í FAS en þá er hefðbundin kennsla lögð niður í þrjá daga (mánudag, þriðjudag og miðvikudag) og nemendur fást við ýmislegt annað.
Á miðvikudag í næstu viku verður haldið svokallað Starfastefnumót í Nýheimum en þá munu mörg fyrirtæki og stofnanir í sveitarfélaginu standa fyrir kynningu á öllum þeim fjölmörgu störfum sem er að finna í okkar ágæta sveitarfélagi. Okkur í FAS þykir við hæfi að tengja vísindadagana okkar við væntanlegt Starfastefnumót.
Í dag var fyrirkomulag á vísindadögum kynnt og farið yfir hvaða hópar verða í boði. Þeir sem enn eiga eftir að skrá sig þurfa að gera það fyrir hádegi á föstudag og geta nálgast upplýsingar um hvaða hópar eru í boði hjá Kristjáni áfangastjóra.
Um nokkurra ára skeið hefur verið hægt að leggja stund á ýmis konar listir í FAS. Það nám er hluti af kjörnámsbraut við skólann. Meðal þess sem hægt er að læra eru; sjónlistir, sviðslistir, hönnun og kvikmyndagerð.
Á þessari önn eru bæði sjónlistir og sviðslistir í boði á námsframboði skólans. Nemendur í sviðslistum taka námið í svokölluðum spönnum en þá er farið hraðar yfir en hefðbundið er og á einni önn farið í efni tveggja áfanga.
Nú er komið að lokum fyrstu spannar í sviðslistum og af því tilefni buðu nemendur kennurum og starfsfólki skólans á sýningu til að sýna afrakstur vinnunnar undanfarið. Þar hefur mikið verið unnið með spuna og hafa nemendur mest verið í því að skapa efni, bæði hver og einn og eins í samvinnu við aðra í hópnum.
Það er skemmst frá því að segja að sýningin í dag gekk ljómandi vel, var skemmtileg og sýndu nemendur á sér nýja hlið. Takk fyrir skemmtilega sýningu.
Það er mikið um að vera þessa vikuna í FAS því við erum með heimsókn frá samstarfsskólunum í nýjasta nemendaskiptaverkefninu okkar. Það verkefni fjallar um nýtingu á náttúrulegum auðlindum og ber nafnið Natural Resources and how to utilize these in rural areas in Finland, Iceland and Norway. Þetta er tveggja ára verkefni og farið er í heimsókn til eins þátttökulands á hverri önn og var fyrsta heimsóknin til Íslands. Frá hverju landi eru 10 nemendur og samskiptamálið í verkefninu er enska.
Gestirnir komu til landsins á sunnudag og til Hafnar seinni partinn í gær. Á meðan hópurinn dvelur hér verður farið í heimsóknir og skoðunarferðir. Þá verða einnig unnin verkefni sem tengjast nýtingu náttúrulegra auðlinda í löndunum þremur.
Hópurinn fer af stað til Keflavíkur seinni partinn á fimmtudag og flýgur utan á föstudagsmorgni. Verkefnið hefur sérstaka vefsíðu og þar er sagt frá því helsta er varðar verkefnið. Meðfylgjandi mynd var tekin í morgun þegar hópurinn fór í heimsókn til Skinneyjar-Þinganes.
Vel lukkuðum rötunar- og útivistaráfanga í fjallanámi FAS lauk fyrr í þessum mánuði. Þar fengu nemendur að spreyta sig í undirbúningi og framkvæmd á fjögurra daga göngu í óbyggðum.
Ferðinni var heitið á Víknaslóðir þar sem gengnir voru ýmsir slóðar frá Borgarfirði til Seyðisfjarðar. Meðal námsþátta var gerð leiðarkorts, veðurathuganir, næturrötun og hópastjórnun.
Veðrið lék að mestu við hópinn en kærkomin þoka gerði þó vart við sig öðru hvoru sem reyndi á góðan undirbúning, landslagslestur og notkun á áttavita.
Kennarar voru: Tómas Eldjárn, Svanhvít Helga, Michael R. Walker, Árni Stefán og Íris Ragnarsdóttir.
Þessa vikuna stendur yfir íþróttavika í sveitarfélaginu okkar. Markmiðið með íþróttavikunni er að kynna íþróttir og hreyfingu fyrir alla og er lögð áhersla á allir geti stundað einhvers konar íþróttir. Þar skiptir aldur, bakgrunnur eða líkamlegt ástand ekki máli. Það er hins vegar staðreynd að öll íþróttaiðkun er líkleg til að stuðla að bættri líðan.
Að sjálfsögðu er FAS með í íþróttavikunni og tekur þátt í viðburðum. Í dag kom til okkar Pálmar Ragnarsson fyrirlesari og körfuknattleiksþjálfari með fyrirlestur um jákvæð samskipti. Þar fjallaði hann á skemmtilegan hátt um hversu mikilivæg samskipti eru og mikilvægi þess fyrir alla að fá hrós.
Við þökkum Pálmari kærlega fyrir komuna og við förum svo sannarlega fróðari um mikilvægi jákvæðra samskipta út í daginn.
