Í síðustu viku lögðu nemendur í fjallamennskunáminu land undir fót og héldu á Tröllaskaga til að læra fjallaskíðamennsku. Fjallaskíðaáfanginn í náminu er kenndur í samstarfi við Menntaskólann á Tröllaskaga sem staðsettur er á Ólafsfirði.
Til stóð að hefja ferðina á mánudegi en vegna slæms ferðaveðurs var brottför frestað um einn dag.
Hópurinn fór því frá Höfn á þriðjudagsmorgun og var kominn á Ólafsfjörð eftir um níu klukkutíma ferðalag.
Miðvikudagurinn fór í að fara yfir og máta búnaðinn, læra grunnatriði um snjóflóð og síðast en ekki síst prófa að ganga á fjallaskíðum og renna sér smá. Farið var í stutta fjallaskíðaferð frá skólanum, innanbæjar á Ólafsfirði.
Á morgni fimmtudags var byrjað á að meta snjóflóðahættuspá og veðurspá fyrir daginn. Að því loknu hélt hópurinn í fjallaskíðaferð þar sem gengið var upp í fjall fyrir ofan bæinn og „út í sveit“ eins og heimamenn segja. Hópurinn renndi sér svo niður stutta brekku og tók æfingu í leit í snjóflóði með snjóflóðaýli og snjóflóðaleitarstöng. Að æfingunum loknum var gengið aftur í skólann. Þegar þangað var komið um klukkan tvö keyrði hópurinn yfir á skíðasvæðið á Siglufirði þar sem restinni af deginum var varið. Þeir sem ekki kunnu á skíði fengu kennslu í auðveldu brekkunum og hinir sem kunnu á skíði skíðuðu erfiðari brekkur af miklum krafti.
Á föstudegi var farið aftur á skíðasvæðið á Siglufirði. Lyftan var tekin upp og gengið út fyrir svæðið þar sem æfingar í mati á snjóflóðahættu voru gerðar, ásamt æfingum í utanbrautaskíðun.
Laugardagurinn var svo ferðadagur þar sem keyrt var frá Ólafsfirði á Höfn.
Næsta ferð hjá fjallamennskunemunum verður aftur á Tröllaskagann  í næstu viku (4.-9. mars) þar sem þau ljúka seinni hluta fjallaskíðanámskeiðsins. Nú er bara að vona að snjórinn haldist þrátt fyrir hlýtt veður næstu viku.

Myndirnar tóku kennarar námskeiðsins Tómas Einarsson og Sigurður Ragnarsson. Fleiri myndir úr ferðinni má sjá á fésbókarsíðu fjallanámsins