Frá uppsetningu á Ronju ræningjadóttur.

Fyrir hönd Lista- og menningarsviðs FAS vil ég þakka Hornfirðingum og öðrum gestum fyrir frábærar móttökur á leiksýningunni Ronju ræningjadóttur sem sýnd var í leikhúsi Nýheima í mars. Uppselt var á allar sýningar og sýnir það áhuga heimamanna á starfi nemenda á listabrautum FAS. Þetta gefur góð fyrirheit um að FAS sé á réttri leið með að bjóða nemendum sínum upp á nám í listgreinum. Aðsókn í námið á skólaárinu 2017 – 2018 fór fram úr björtustu vonum.
Á næsta skólaári verður boðið upp á nám í hinum ýmsu listgreinum og er von skólans og áhersla að styðja nemendur og aðstoða hvern einstakling í að finna þá leið sem hentar hverjum og einum í gegnum námið. Listnám hefur margsannað gildi sitt auk þess sem það er bæði nærandi fyrir sálina og styrkjandi.

Fjórða iðnbyltingin svokallaða er hafin. Þar sem gervigreind vélmenna er að taka við færibandavinnu gamla tímans. Í fjórðu iðnbyltingunni er hugur manneskjunnar, frumkvæði og skapandi hugsun dýrmæti framtíðarinnar. FAS er skóli sem býður nemendum sínum nám á Lista- og menningarsviði sem leiðbeinir nemendum að takast á við sjálfstæð vinnubrögð og skapandi hugsun.
Takk kæru Hornfirðingar fyrir skólaárið sem er að líða.

Stefán Sturla
umsjónarmaður og kennari Lista- og menningarsviðs FAS