Upp úr miðjum júlí fóru þýðversk ættmenni að streyma til landsins. Tilefnið var silfurbrúðkaupsafmæli Kalla og Rósu. Það var ákveðið að bjóða fyrst til veislu í Kópavoginum og halda síðan í Brekkuskóg þar sem átti að dvelja í viku í sumarbústöðum. Þaðan voru svo fyrirhugaðar styttri ferðir enda margir áhugaverðir staðir í nágrenninu. Að sjálfsögðu létum við okkur ekki vanta og mamma og Konnsi voru einnig á svæðinu.

Þegar halda skal veislu í Viðihvamminum virðist vera hægt að lengja borðstofuborðið í það óendanlega. Allur undirbúningur var glæsilegur og maturinn frábær.

Í eftirrétt var þessi frábæra kaka - skorin saman af hjónakornunum líkt og fyrir 25 árum.

Hafdís Lára var spennt að hitta skyldfólkið sem hún hafði ekki séð í fimm ár. Hér er hún með ömmubróður sínum Óskari og konunni hans Ilse.

Eftir veisluna góðu var haldið í Brekkuskóg þar sem dvelja átti í eina viku. Í upphafi voru við tæplega 20 en fækkaði eftir því sem leið á vikuna. Það voru miklar matarbirgðir sem voru bornar í annan sumarbústaðinn en þar var alltaf borðað. Já það var líka nóg að gera í að vaska upp eftir allan þennan hóp.

Setið að snæðingi eitt kvöldið. Frá hægri: Silke, Ilse, Konnsi, Óskar, mamma og Kalli.

Við fórum með tjaldvagninn okkar og höfðum hann fyrir utan annan bústaðinn. Þar var stundum setið og spjallað.

Einar og Birte á góðri stundu. Einar tilbúinn með flugnanetið ef einhverjar flugur kæmu of nærri honum.

Einn daginn var ákveðið að skoða Gullfoss frá báðum hliðum. Á leiðinni þangað komum við hjá fossinum Faxa. Eins og á mörgum öðrum stöðum var þar ágætt tilefni til að taka mynd.

Allur hópurinn samankominn við Faxa.

Gullfoss eystra megin - Einar var skynsamur og gekk alltaf með flugnanet í vasanum. Það kom vel að notum þarna því það var ótrúlega mikið af mýi. Það er jafnvel hægt að greina flugurnar á þessari mynd.

Mikið eru þær sætar frænkurnar - Hafdís Lára og Heiða.

Það er miklu tignarlegra að horfa niður eftir Hvítá á eystri bakkanum.

Já, hér sést vel hvernig gljúfrin hafa grafist niður í árannar rás.

Frá eystri bakkanum - ótrúlega flottur - ekki satt.

Hefðbundið sjónarhorn - vestan megin við Hvíta.

Glæsilegar skvísur á öllum aldri.

Við Geysi á góðum degi - nærri því of mikil sól. En mikið eru frændsystkinin flott.

Hafdísi Láru leiðist ekki að sprella með Heiðu og Finni.

Það tilheyrir að skoða Skálholt þegar dvalið er á Suðurlandinu.

Það er alltaf jafnflott að skoða Brúarhlöð.

Hafdís Lára og Birte frænka hjá Hjálparfossi en þar er mjög fallegt stuðlaberg.

Við Þjóðveldisbæinn í Þjórsárdal er þetta litla bænhús - Kalli og Rósa á góðri stundu.

Þarna voru líka sætir og forvitnir kettlingar sem voru tilbúnir að sinna gestum.

Við mæðgur ásamt Svenju og Merle.

Amma Margot og Hafdís Lára.

Næst var haldið upp á hálendið og Sultartangavirkjun heimsótt. Hér sést vel frárennslisskurðurinn frá virkjuninni. Búrfell í baksýn.

Ofan á Sultartangavirkjuninni var langt að horfa niður á stöðvarhúsið og vatnið - Hafdís Lára tók að sér að passa Kalla frænda.

Einn af mörgum "drekkutímum" þar sem þess var notið að sitja úti í guðsgrænni náttúrunni og næra bæði sál og líkama.

Birte frænka mín kom með okkur Hafdísi Láru austur - við skruppum upp í Lón þar sem alltaf er jafn fallegt. Þessi mynd er tekin af ósk frænku minnar.

Í gilinu fyrir innan bústaðina í Stafafellsfjöllum eru víða ótrúlegar bergmyndanir - hér hefur Birte tyllt sér niður á grænleita flögusteina.