|
föstudagur, 03 febrúar 2012 |
 Fyrsta þorrablót Nemendafélags FAS var haldið í gærkvöldi,
fimmtudaginn annan febrúar og tókst það með eindæmum vel. Nemendur hittust í
Nýheimum og snæddu þorramat frá Kaffihorninu. Minni karla og
kvenna voru lesin ásamt því sem sungin voru lög sem tilheyra þorranum.
Undirtektirnar voru mjög góðar og lék Sigurður Mar undir á
mandólín sem verður þó að teljast óhefbundið en engu að
síður stórskemmtilegt.
Eftir að kvöldverðinum lauk lá leiðin í Sindrabæ þar sem Dj Óli Geir lék
fyrir dansi fram eftir nóttu. Eins og áður sagði tókst kvöldið í alla
staði mjög vel og stóðu stelpurnar í skemmtinefnd Nemendafélagsins sig
stórkostlega í allri skipulagningu og undirbúningi blótsins.
Gaman væri ef þessi viðburður festi sig í sessi og verði endurtekinn að
ári og þá með þátttöku enn fleiri nemenda og starfsmanna FAS.
|
|
|
Vinir Vatnajökuls styrkja FAS |
|
fimmtudagur, 02 febrúar 2012 |
 Um langt skeið hafa verið stundaðar ýmsar náttúrufarsrannsóknir í FAS. Þar má nefna jöklamælingar, rannsóknir á gróðurframvindu á Skeiðarársandi, álftatalningar í Lóni og fuglatalningar í Óslandi. Með tíð og tíma hafa safnast gögn og mæliniðurstöður. Sú umræða hefur komið nokkrum sinnum upp í FAS að gaman væri að gera þessar upplýsingar aðgengilegar fyrir almenning.
Í haust sótti skólinn um styrk til Vina Vatnajökuls til að vinna að þessu verkefni. Skólinn fékk styrk upp á hálfa milljón til að koma þessum gögnum á vef skólans. Um leið verða þessar upplýsingar aðgengilegar fyrir þá sem hafa áhuga.
Vinna við þetta verkefni er þegar hafin og stefnt er að því að verði lokið í júní.
|
|
|
